Get Mystery Box with random crypto!

КЫСКА-НУСКА

Telegram каналынын логотиби kyskanuska55 — КЫСКА-НУСКА К
Telegram каналынын логотиби kyskanuska55 — КЫСКА-НУСКА
Канал дареги: @kyskanuska55
Категориялар: Uncategorized
Тил: main.Kirgizian
Абоненттер: 342
Каналдан сүрөттөмө

Кыска көркөм чыгармалар.
Байланышуу - @tokoevmarat

Ratings & Reviews

3.00

2 reviews

Reviews can be left only by registered users. All reviews are moderated by admins.

5 stars

0

4 stars

1

3 stars

0

2 stars

1

1 stars

0


Акыркы Кабарлар

2022-07-09 09:16:30
16 views06:16
Ачык / Комментарий
2022-07-08 09:12:54 Бакай АЛМАЗ

УУРУЛУК

Ар күнкүдөй эле бүгүн да троллейбуска түштүм. Элдин көптүгүн айтып бүтө албайм, баары эле тагдыр-жазмышын ушул жалгыз троллейбуска байлап, саласал кылып алгансып, агылып кирип, төгүлүп түшүшөт. Ал аялдамадан бул аялдамага, бул аялдамадан кийинкисине... Улам кичүүсү улуусуна орун бошотуп, бошотпогону терезесине башын жөлөп коюп, арамданып, туруп кетсе жер көтөрө албай калчудай болуп, уктамыш этип үн-сөзсүз отуруп берет. Үптөн улам үшкүрүнүп коюп, качан жетер экенмин деген гана ойду мээңе тагып алып, ары карасаң бирөөгө көзүң чагыла кетип, бери карасаң бирөөнүн аялуу жерине назарың түшө калып, кээде тыгылып бараткандагы эки жаштын обу жок кылыгынан коомдук транспортко өзүң эле эмес, өзүңөн өтүп көзүң деле батпай кетет. Кылымдын кыйырын көргөнсүп, азабын ар бир жүргүнчүгө армандап айтып жаткансып, бечара унаа күрүлдөйт, чачырап кете тургансып тырылдайт, бирок кулагы көнүп кеткен элдин бири да бу байкуштун ызалуу арманына кулак төшөп койчудай эмес. Коомдук унаалардагы күнүмдүк тагдыр ушундай.

Улуу кишиге орун бошотуп берип, орто ченде каздын моюнундай чайпалып, кармоочту өзүм менен ала кетчүдөй, үзө түшчүдөн бетер, өч ала тургансып кармап, жыштыктан айла таппай баратам. Чөнтөгүмдөгү телефонумду, жонбаштыгымды улам-улам карап, кармалап, көз салып турам. Ойго сүңгүп кеткем. Бир убакта бирөө катуу түртүп өттү. Атайын кылган немедей ушунчалык берилип түрттү дейсиң, мен атайласам да окшошмок эмес-оов! Оюма апамдын “Чөнтөкчүлөрдөн сак бол, түртүмүш этип эле алчусун алып кетип калат, сезбей каласың” деп нечен жолу кайталай берген сөзү кылт дей түштү. Төмөнкү чөнтөгүмдү, жонбаштыгымды карап-кармалап, сыйпалап эле таппай калдым... Жок! Шарт эле кылчая калсам баягы чачы жибектен бетер сеңселип, белинен ылдый узаган кыз унаадан түшүп, тротуарга аяк басып, бирөө азыр гана кууп калчудай шашып кетип барат. “Жок! Жоголду!” дедим ичимден. “Кармагыла!” деп айта калчудай энтигип барып токтодум. Кыз болгондугу үчүн аядым, ошончо элдин алдында жүзү кара кылгым келбеди. Бирок, жок! Баалуу немемди качан, каерден көрө калды экен? Илип кетиптир, түртүп баратканда... Кашайып ойго батып кеткенимди айтсаңчы, кыздыгын аяган имишмин... Кайра өзүмө ачууланып баштадым. Унаа жүрүп барат. Жанагы "ууру" кыздан узай берип, ал бизден узай берип, карааны көрүнбөй кала берди. Оюм он. Эми эмне кылдым? Өзүмдүн боштугума, чечкинсиздигиме, шалаакылыгыма айла таппай маң болдум... Жоголду. Жок!..

Акыры жетер жериме жеттим. Бирок, эмне кереги бар? Көңүлүмө уурдаткан баалуу буюмум гана туруп алды. Шаабайым сууду, айлам алты кетти, эми аны издеп кайдан таптым... Ошондо эле айгай салып, же жок дегенде жүзүн түзүгүрөөк тиктеп албай... Аттиң. Эмне кылдым? Кайда бардым? Кимге арызданып, кимге издетип, кимге таптырам? “Жок эми! Жоготтуң! Көрбөйсүң!” деген сөздөр гана мээмди чарк айланып туруп алды. Мындай уурулукка өмүрүмдө кабылып көргөн эмесмин...

Ал жүрөгүмдү уурдады!..

#карасөз
42 views06:12
Ачык / Комментарий
2022-07-07 09:12:52 Бред Д. ХОПКИНС
 
СҮЙҮҮНҮН ТҮГӨЙҮ

Бир жолу Топон суу болот. Ной: “Түгөйлөрдү гана алам. Жалгыздар - жакындабасын!!!”, - дейт.

Сүйүү Намыска, Байлыкка, Атакка, Бакытка барат, бирок алардын түгөйлөрү бар чыгат.

Ошондо Ажырашуу келип: “Мен сени сүйөм” дейт.

Экөө кемеге отурушат.

Бирок Ажырашуу чынында Сүйүүгө ашык болуп, жерге жеткенде да ажырашкысы келбей коёт.

Ошондон бери Сүйүү каякка барбасын аркасынан Ажырашуу ээрчип жүрөт экен…

Которгон Марат ТОКОЕВ

#карасөз

#55сөз

#котормо
51 views06:12
Ачык / Комментарий
2022-07-06 09:12:19 Сагын АКМАТБЕКОВА

ЗАКЫМ

М. Т.га

Кеч күүгүмдө жээкти бойлоп кайчы өттүк. Кайчы өткөн издерибизди толкун жууду, кездер бизди жуугандай. Жуулдукпу, же жокпу?

Ушул чалкыган аалам астында сени гана жакшы көргөнүмдү айтсам ишенээр белең? Жок, айтпайм. Жаап койгом капкагын ал сезимдин.

Өткөрдүм сенсиз узун-узун өмүрдү. Өзүмчө тирдик кылдым. Кайчы өттүк кеч күүгүмдө жээк бойлоп, узадык бирибизден-бирибиз улам алыс. Кылчайбадым. Изимди толкун жууду. Билем, сен да кылчайган жоксуң. Кеттиң өз жолуң менен.

Көздөрүңдүн жарыгын канчалык көргүм келсе да тик багып карабадым. А балким эчак өчкөндүр ал жарык, балким тике бакпаганым ырас болгондур.

Көздөрүңдөгү жарыктын өчкөнүн көрүү баарынан коркунучтуу. Мен үчүн. Ошондон корктум.

Бирок билгем ушул күндөрдө, ушул жээктен жолугаарымды. Билгем.

Июль, 2003

#карасөз
63 views06:12
Ачык / Комментарий
2022-07-05 09:12:47 Ясунари КАВАБАТА

КАНАРЕЙКАЛАР

«Жаным! Сага кат жазбайм деген убадамды бузууга аргасызмын. Бирок сага мындан башка кат жазбаймын. Анткеним, сен мага өткөн жылы белекке берген канарейкаларды багалбай калганымды айтайын дедим. Бул күнгө чейин аларды келинчегим багып келди. Мен анын чымчыктар менен кантип алектенерин карап олтуруп, сени дамамат эстечүмүн…

Сенин колуктуң, а менин күйөөм бар, ошон үчүн мамилебизди токтотолу. Эгер аялың болбосо, анда... - дегениң эсиңдедир. Дагы ар нерсени айткансың... Анан мага эки канарейканы белекке тартуулап, аларды – жаншериктер дегенсиң. Саятчы[1] бир эркек, бир ургаачысын кармаптыр да, экөөнү бир торго чогуу камап көндүрүптүр.

Чымчыктар болсо экөө бирге болуп калышарын эч качан ойлоруна албаган. Аларды көргөндө, мени эстей жүр дегенсиң. Чымчык тартуулоо – жок жосундай көрүнөр, арийне ал, экөөбүз жөнүндө эстутум эмеспи. Бир күнү алар да өлөт. Кези келгенде биздин да эстутумдар так ошентип өчсүн дегениң жадымда.

Эми карасам, бул канарейкалар жакында өлчүдөй. Анткени аларды багып жүргөн адам акка өзү моюн сунбадыбы. Өзүң билесиң – мен кембагал, шалаакы бир сүрөтчүмүн. Бапестеп багуунун кыныгын алган чымчыктарды асырай алат белем. Сөздүн ток этер жерин айтсам мындай: колуктум өлүп тынды, эми канарейкалар да аркасынан кетчүдөй. Азыр баамдасам, колуктум болгон үчүн да сен тууралуу эсим эсен турбайбы.

Канарейкаларды эркиндикке бошотсомбу деген ой келди, бирок келинчегимдин өлүмүнөн кийин алар да алсырап калышкансыйт. Анан да алар кең асман эмне – билишпейт. А жакынкы токойдо канарейка аттуу канаттуулар да жашабайт, дегеле алардын бара турган жайы жок. Сен мага саятчы бир эркек, бир ургаачысын кармап, экөөнү бир торго чогуу камап көндүрүптүр дегениң менен, агер экөө бири-биринен ажырай турган болсо, алар өз өзүнчө өлүп тынышар.

Дүкөнгө сатып ийсемчи? Жок, андайга баргым келбейт. Анткени алар сенин тартууң эмеспи. Сага кайтарсамчы? Бу да эп эмес. Аларды келинчегим багып жүргөндүктөн, сен аны балким, таптакыр унуткандырсың. Сага алар артыкча жүк болор.

Дагы бир жолу айтаарым: келинчегим тирүү кезинде – чымчыктардын жашоосу уланчу. Канарейкалар канча жолу сени эсиме салып турбасын, бирок кандай болгон күндө да алар деле колуктумдун аркасынан одүйнө узашы керек деген ойдомун. Кеп, эскерүүдө гана эмес да. Эмне үчүн биз бири-бирибизди сүйүп калдык экен? Себеби менин келинчегим бар болчу да. Күнүмдүк көртирликтин баардык жүгү келинчегимдин гана мойнунда болгондуктан, мен өзүмчүл болуп калыптырмын. Эгер мен бул кадамга барбасам, сенин алдыңда көзүм тайсалдап кала турганмын.

Андыктан сага бир өтүнүч менен кайрылганымдын жөнү – аларды өлтүрүп, жаншеригим менен кабырга бирге көмүп койсом болобу?»

Которгон Марат ТОКОЕВ

#карасөз

#котормо
74 viewsedited  06:12
Ачык / Комментарий
2022-07-04 11:13:02 КЫСКА-НУСКА pinned «55 сөздөн турган кыска чыгармаларга сынак // Бир кезде New Time журналы жарыялаган сынакты биз дагы жарыялап көрөлү деп чечтик. Ал сынакка катышкан айрым чыгармалардын котормолору менен биздин каналдан тааныша алдыңыздар (#55сөз хештеги менен белгиленгендер).…»
08:13
Ачык / Комментарий
2022-07-04 11:12:44 55 сөздөн турган кыска чыгармаларга сынак //

Бир кезде New Time журналы жарыялаган сынакты биз дагы жарыялап көрөлү деп чечтик. Ал сынакка катышкан айрым чыгармалардын котормолору менен биздин каналдан тааныша алдыңыздар (#55сөз хештеги менен белгиленгендер).

Сынактын шарттары:

- Сынактын аталышында эле айтылып тургандай, чыгарма 55 сөздөн турушу керек;

- Чыгармада сюжеттин тактыгы, каармандардын элестүү болушу жана чыгарманын күтүүсүз аякталышы зарыл.

- Сынакка 1 автордон 5тен гана  чыгарма кабыл алынат (5тен аз болушу мүмкүн, бирок 5тен ашпашы керек. 5тен көбүрөөк жиберип, “өзүңөр тандап алгылачы” дебегиле. Өзүңөр тандап жибергиле :-). Ар кимибиздин табитибиз ар башка, кийин таарыныч болбогондой болсун. Анан да бул тандоо аз болсо да кайсы бир убакыттыбызды алат).  

- Чыгармалардын авторлору көрсөтүлбөйт, анононимдүү жарыяланат. Ар бир чыгармага номур коюлат.

- Сынактын шарттарына туура келбеген чыгармалар жарыяланбайт!

Сынактын мөөнөтү:

4-июлдан 1-сентябрга чейин.

Жеңүүчүлөрдү аныктоо:

Жеңүүчүлөрдү атайын жюринин курамы аныктайт. Ага таанымал, адабияттагы баамчылдыгы, калыстыгы менен белгилүү чыгармачыл адамдар киргизилет.

Сыйлыктар:

Сыйлыктар капчыгыбызга жараша дегендей…

3 жеңүүчүнүн ысымдары каналыбыздын АРДАК ТАКТАСЫНА жазылат.

Ошондой эле алардын сынакка катышкан чыгармалары жана да жюринин пикиринде мыкты деп табылган 20 чыгарма электрондук китепке киргизилет. Аталган китепти каалоочулар биздин каналдан жана https://elkitep.su/ сайтынан жүктөп алса болот. 

Эгер сынагыбызга демөөрчүлөр чыга турган болсо, биз ыраазы гана болобуз! Демөөрчүнүн ысымы сынакка катышкан ар бир чыгарманын алдында жазылып турат!

Чыгарманы жиберүү дареги:

Чыгармаларды jolkanaly@gmail.com почтасына “55 сөз сынагына” деген аталыш менен жибергиле. Катта аты-жөнүңөрдү, байланышуу маалыматтарын толук көрсөткүлө.

Сынактын жарыяланышына байланыштуу каналыбызда күнүнө жарыяланып турган чыгармалардын саны да өзгөрүшү ыктымал. Бирок да күнүнө 5тен ашырбаганга аракет кылабыз  

#сынак

#55сөз
80 views08:12
Ачык / Комментарий
2022-07-04 09:12:04 Топчугүл ШАЙДУЛЛАЕВА

БИРИ КЕМ ДҮЙНӨ

Бир айылда жашаган, бирок орун очогу эки башка эки келин арылгыс арманга малынды. Кырктын кырына жаңы келген, ак жуумал, узун бойлуусу бакырайган көздөрүн жашка толтуруп, ый аралаш көңүл айтып келгендерге сүйлөп жатты:

– Өлбөй эле тирүү жүрсөчү, байкушум. Мен анын бардык кылык-жоругуна чыдайт элем. Элчилеп келин-кызга барып, көзүмө үймөктөп чөп салса деле мейли эле, катын алса да мейли эле, тирүү эле жүрбөйбү. Жашай турган чагында жайрап калды, жок дегенде балдарынын биринин жакшылык күнүн көрсөчү, төрүндө чайын ичсечи… Өлөрүн билди бекен, же бир көңүлүмдү калтырсачы…

Экинчи келин эми гана элүү таяп, бирок сын келбети жарашкан, үйүн үй, жайын жай кылган, өзүн мыктылардын биримин деп эсептеген аялдардан эле. Ал да көңүлүн сурап келгендерге буркурап ыйлап жатты:

– Ушундан көрө өлүп эле калсачы, мени элге, журтка шерменде кылбай. Эл караган бетим жер карады, кызындай болгон немени да алабы. Анысынын заматта тууп салганын кантесиң, бети жок. Балдарды тирүү жетим кылды, үйдө эмне жетпеди эле бул аңгиге, жээрин жеп, ичээрин ичип жүрүп кутурган акмак, барып бетин тытып келбесем атым өчсүн, өлтүртүп салам, жашатпайм жарык дүйнөдө… Мен эми кантем карып карыга окшобой, же жаш болбосом. Ушинтип кара башым какшап калабы!..

Эки эркектин айынан бу эки зайып көп жылдар ыйлашты. Бирөө ыйлаган сайын өлгөн эринин кадырын көтөрдү. Жанда жок асылга айланты. Балдары атасы өлсө да анын атын сыймык менен эскерип жүрүштү. Тууган-уругу бул үйгө колдон келген жардамын аябай берип, колдоп келди. Убагында өз ишине берилип иштеп, үйбүлөсүн жанындай көрүп, кокус көзү өткөн эркектин сүрөтү ардакталып үйүнүн төрүндө илинип турду. Жубайы, бала-чакасы бул сүрөткө кудайындай сыйынып, коногун да ушул сүрөт алдында тосуп, эки сөзүнүн биринде аны эскерип, кийген кийимин көзүнө сүртүп, жыттап жүрүштү.

Өлгөн эркек денеси гана жок, өзү болсо бул үйдөгүлөргө аралашып, алардын жүрөгүндө, көңүлүндө түбөлүк калды.

Экинчи үйдө болсо энесинин ар бир ыйы балдарындагы атасына болгон көңүл калуучулукту ансайын күчөтүп отурду. Соодагер аялынын тапканын чачып, ичкенде ичип, иштегенде иштеп жүрүп, бир күн сүйүүгө кабылып калып, бала-чакасын таштап, кетип калган эркектин азан чакырып коюлган өз ысмы кеткен күнүнүн эртеси эле өчүп калды. Үйүндө чоңоюп калган балдары ага «Мажнун» деген атты коюшту.

Ал жөнүндөгү ар бир эскерүү ыза менен, жек көрүү менен коштолуп жатты. «Мажнун» атанын үйдөгү кийимдери байпагынан өйдө короого чыгарылып күйгүзүлдү. Ага тиешелүү буюм-тайымдын баары акыр-чикир салынчу жашикке ыргытылды. Сүрөттөрү тытылды. Бирге түшкөн сүрөттөрдөн анын сөлөкөтүн кесип салышты. Кыскасы, жыйырма жылдан ашуун бул үйдө эр, ата болуп келген эркекти биротоло жокко чыгаруу чабуулу катуу башталды.

Күйгөн көйнөктөр менен кошо, балдардын көкүрөгү да күйдү, тытылган сүрөттөр менен кошо алардын атага болгон мээр-акыбетинин да быт-чыты чыкты бейм. Балдар атасы жөнүндө кокус сөз болгондо жер тиктеген бойдон үн катышпайт. Алар ыйын, жоктоосун энесиндей болуп ыйлап чыгара алышпады, каргай алышпады, сөгө алышпады, ичинен сызышты. Кеткен эркектин тууган-уругу бул үйгө даап басып келе албай, балдар атасыз гана эмес, туугансыз да калышты.

#карасөз
76 viewsedited  06:12
Ачык / Комментарий
2022-07-03 09:12:21 Станислав СЕВАСТЬЯНОВ

АЯЛ БАКТЫСЫНЫН СЫРЫ

Маша Скворцова кооз көйнөгүн кийип, боёнуп, үшкүрүнүп алды да чечкиндүү кадам жасап - Петя Силуяновго конокко жөнөдү. Петя аны укмуш даамдуу пирожныйлар менен коноктоду. Вика Телепенина болсо эч жасанбай, боёнбой, үшкүрүнбөй Дима Сеоезневдун үйүнө шар кирип келди. Дима арак жана даамдуу колбаса менен тосуп алды. Байкаганыңардай, аялды бактылуу кылууну сырлары өтө көп.

Которгон Марат ТОКОЕВ

#карасөз

#котормо
85 views06:12
Ачык / Комментарий
2022-07-02 09:12:39 Эрнис АСЕК УУЛУ

КӨЗАЙНЕК

Студент кезде лекциялардан «Не смотри на мир через розовые очки» деп орусча кат жазышар элек. Дүйнөнү сугалак көздөр менен караган ошол кез кайда десең? «Кара сайда!» деген киши жок. Көзүм сегизинчи класстан эле бузула баштады. Китеп менен телевизордун сазайын бердим го! Азыр деле ошол. «Ээ, кудай садагаң кетейин, көздүн да курчу кетти, ушул көзүмдү албасаң экен» деп калаар эле чоң апам. Кудай апамдын жалынычын укпады. Көр болуп калды. Көзү көрбөсө да, көөдөнү менен көрөр эле. А биз көзүбүз көрсө да, көөдөнүбүз сокур. Он жылдан бери көзайнексиз жашоо жок. Жылдан жылга күчөп да барат. Канча көзайнек сындырдым? Миллион! Көзайнекке кеткен акчалар азыр бар болсо, миллионер болмокмун, эй! ... Көк асманды, жылдыздуу түндү көзайнек менен карагандан кача баштадым. Эшектей эле жер карайм, жер карайм… «Көөдөнүң көр болсо, бара-бара көзүң да көр боло баштайт турбайбы» деп чоң апам кобуранып калчу эле. «Слепой ведет слепого» деген сөздөр «көө-дөндөн» ушундай бир буулугуп чыгат дейсиң… Тык токтойсуң! Анткени Акыйкаттын Кайнар Көзү турат. А сен туткундасың. Жер — түрмө, сен — түрмө, ал — түрмө, мен — түрмө… Түтүнүң чыгат. Түндөй караңгыда турасың. Көзгө сайса көрүнгүз. Көзайнегиңди аачымыш болосуң. Көөдөнүңдү аачыйын деген оюңа да келбейт…

2005

#карасөз
123 viewsedited  06:12
Ачык / Комментарий