Кыргыз Поэзиясы

2022-07-09 10:01:07 КАРА КӨЗ АЙНЕКЧЕН СУЛУУГА

Жашырыпсың көзүңдү тийген Күндөн,
Жамалыңа нур берип сүйгөн Күндөн.

Гүлдөр сенин көзүңдү карап калчу,
Куштар көрүп көзүңдү канаттанчу.

Бир көрсөм деп асманда токтоп булут,
Кайра жылат көзүңдү жоктоп туруп.

Көз айнекти башкалар тагынышсын,
Сен тагынып эмнеге жаңылыштың?

Сенин көзүң тоо көлү таза турган,
Көз эмес да башкадан ката турган

Көңүлүмдү эргитип күлмүңдөгөн,
Көзүңдө эле үмүтүм бүлбүлдөгөн.

Көйкөлөйүн көз нуруң жамынайын,
Көз айнексиз карачы кагылайын…

Сооронбай ЖУСУЕВ Ачык / Комментарий

2022-07-09 09:17:45 Ачык / Комментарий

2022-07-08 10:02:15 ЖҮРӨК-ТАШ

Жол баратып жүрөк-таш таап алдым,
Кызыл экен канга окшоп өңү дагы.
Тарам-тарам кылдай бир жолдор кеткен,
Кудум эле жүрөктүн тамырлары…
 
Таш деген таш, тулкусу муздак экен.
Жылдар балким жылуусун уурдап кеткен –
Качандыр бир магмадай кайнап турган,
Кагылышта ыргыган жүрөк бекен…
 
Катты да анан кан жүрбөй калган жүрөк,
Таштарды да бир кезде каптаган өрт…
Тоолор дагы от болуп кайнап турган.
Көрүп турган Болмушту бир гана Көк.
 
Жүрөк-таш да – мен жолдон таап алган,
Качандыр бир от болуп кайнап турган…
Жылуусу өчүп, секинден табы кайтып,
Жүрөк чыгар чын эле – ташка айланган…

Фатима АБДАЛОВА Ачык / Комментарий

2022-07-07 10:03:42 * * *

Октябрдын янтарь сиңген тынчтыгы,
жылжып агып келди кайра жашоомо.
Таңдай тунук сезимдерге тумчугуп, 
унут калган кыялдарды камчылап,
кеткиң келет тараптарга баш оогон.
 
Күндүн нуру ушунчалык жагымдуу
тиет, кудум жүрөгүңдү жылыткан
жакшы сөздөй, жана ушул агымдын
кучагында, алды жакта келаткан
кычыраган кышты келет унуткуң.
 
Ысык кайтып, а бирок суук келелек.
Мээлүүн аба жан сергитет. Туптунук
таңдар жана кечтер турат желелеп
бульвардагы дарактарды. Кулпунуп
калаа дагы болуп барат керемет.
 
Дизайнердей таланттуу да талапты
койгон сары түстүн палитрасына,
Октябрь, асемдеди калааны,
шаардыктардын татып мыкты баасына,
жүрөктөрдө козгоп сагынч, санааны.
 
Бул күндөр да бүтпөс болуп сезилген
чексиздиктин кучагына узайбы?
Күздүн мөлтүр салкынына эзилген,
токто, токто кайталангыс көз ирмем!
Кандай арман бир багыттуу мыйзамың.

Абдысамат САРАЛА Ачык / Комментарий

2022-07-06 10:05:30 * * *

Мен эми кайда кетип, кайда барам?
Багытым калды сынып, карып сапар.
Дарчыдай басып өткөм араң-араң
Сүйүүнүн ок жолундай жолун татаал.
 
Түн каткан жолоочудай кетти жаштык,
Алыстап таштуу жолдо ат дабышы.
Биз бастык, эл баспаган жолду бастык
Суктантып кабар алган кары-жашты.
 
Буюрулбас жөрөлгөгө айып, күнөө
Жөн гана өмүр жолу ал бир эски.
Сага эми кезиксе экен мендей бирөө,
Болбосо менден жакшы, менден эстүү.
 
Таалими айкөл, таза өзүңө окшоп
Муңдурбас тамашакөй болгой эле…
…Баары бир бассаң-турсаң мени жоктоп,
Баары бир ойлойсуң го болбой эле…

Омор СУЛТАНОВ Ачык / Комментарий

2022-07-05 10:02:08 КАСАП ДҮЙНӨ

Ада кылып амалыңды, айлаңды,
Алат өлүм кедейлерди, байларды, 
Азыр бирок асый чыкпай калат деп
Аяп турам касаптагы тайларды. 

Үч-төрт жигит жең түрүлүп карууда, 
Үмүт отун өчүргөнү барууда. 
Бир өлүмдүн урматына тирүүлөр 
Бир өмүрдү курмандыкка чалууда. 

Бул жазмыштан мүмкүн эмес калкалаш 
Бул мыйзамды оңой болбойт талкалаш, 
Тамчы өмүрүң таш бетине тийгенче
Тагдыр талаш, намыс талаш, жан талаш... 

Тирүүлүктө - тизгин талаш, төр талаш, 
Типтик өйдө багытталган өр талаш. 
Өлгөндө да өзгөлөрдү басынтып 
Өзүнүкүн көкөлөткөн көр талаш. 

Бийлик үчүн тегерете чеп курган,
Биттери да бийик сөздү кеп кылган
Бир билгени болсо керек бул дүйнө,
Бирин бири үзүп-жулкуп жеп турган. 

Убактылуу ойлонгонум, күлгөнүм,
Утурумдук өмүр болсо сүргөнүм, 
Түрткүлөшкөн мал базардай жашоодо 
Түшүнүксүз, эмне кылып жүргөнүм... 

Жыргалбек КАСАБОЛОТ Ачык / Комментарий

2022-07-04 10:02:34 КАР ЖААГАН ТҮН

Менде жок келчү мейман, кетчү мейман.
Кар гана балбалактап көмөт тышты.
Баштадым даа бир кышты…
Менде жок келчү мейман, кетчү мейман.
Түн узун бир шумдуктуу.
Сандаган элестердин арасынан
мен өзүмдү таап араң
туурулган колум менен
сылаймын жымжырттыктын маңдайынан.
(Эшигим ачылчудай болот менин)
Жымжырттыктын нар жагында
жымжырттыктын духун сыгып,
апамдын назга толгон колу менен
алып келип берчүдөй болот мага.
Менде жок келчү мейман, кетчү мейман.
Кар гана аппак сүткө боёйт тышты.
Капырай, ит жаң-жуңу эстен чыкты.
(Эшигим ачулчудай болот менин).
Менде жок келчү мейман, кетчү мейман.
Кирпик каткан.
Уйку качкан.
Кар гана акактантат картаң дубду.
(Эшигим ачылчудай болот менин)

Алым ТОКТОМУШЕВ Ачык / Комментарий

2022-07-02 10:01:39 ЖҮЗ ЖЫЛДАР МЫНДАН КИЙИН ДА

Жүз жылдар мындан кийин да
Бул тоолор минтип турушат.
Анда да бизче адамдар
Карыбас үчүн тырышат.

Жүз жылдар мындан кийин да
Сүйүүлөр болот ушундай.
Үшүнтүп жерге жаз келип,
Үшүнтүп чыгат ушул ай.

Жүз жылдар мындан кийин да
Дарактар желге ыргала
Шуудурап турат үшүнтүп…
Биз жокпуз аттиң бир гана.

Сүйүнбай ЭРАЛИЕВ Ачык / Комментарий

2022-07-01 10:02:26 УКТАП ЖАТСАҢ КЕРЕК

Жарык өчүп ак жүзүңдөн нур тамып,
Шок эриниң бир аз гана тынч алып,
Шириндигиң наристедей уктасаң,
Наздуу жанды көрбөгөнмүн мынчалык.

Уктап жатсаң керек
Назик колуң жууркан көздөй тартылуу,
А үстүңдө мамык кебез артылуу,
Сен уктасаң жыттап алып чачыңды,
Жаздыгың да түбөлүккө бактылуу.

Уктап жатсаң керек
Периштенин канатында кагылып,
Кундуз чачың жаздык толо жайылып,
Бейпил түндө жалгыз өзүң уктайсын,
Бакырайган көзүң кирпик жамынып.

Уктап жатсаң керек
Турган өңдүү уячаңда күн күлүп,
Дем алганың эркелигиң билдирип.
Токтобосун жүрөгүңдүн кагышы,
Дайымкыдай бир адамды сүйдүрүп.

Укта, эркем, ты-ы-ынч гана,
А мен тилейм күткөн күнгө жетебиз,
Бул өмүрдөн кайгы көрбөй өтөбүз,
Балкып гана бакыт сезип жашайбыз,
Бирге уктап бир жаздыкта экөөбүз.

Самаган МОЛДОЯРОВ Ачык / Комментарий

2022-06-30 10:01:54 АРТЫМДЫ КАРАЙМ УЛАМ

Азыр мага
башымды жөлөп алып,
мойнунан бек кучактап
ыйлаганга ийин керек.
Ким болсо
ошол болсун,
атын да
айтпай койсун.
Мен ыйлап бүткүчөктү
чачымдан аста сылап,
болгону, болгону эле
ийинин тосуп койсун.
Элпектенип эч кимди
туурабасын,
эбиреп көңүлүмдү улабасын.
Эчкирип кошо ыйлап
бетимди суулабасын.
Эми кантем элдерден
өткөн-кеткен
дегенсип корунбасын,
уялбасын.
“Эмне болду айтсаң”- деп
сурабасын.
Баары бир жооп бере албайм,
бүт денем талып турат,
баягында бакыт издеп
чыккан элем,
ошол сапар мына азыр
карып турат.
Басынып, чүнчүп, анан
көңүлүм көп нерседен
калып турат.
Үн-сөзсүз кулачудай,
жыгылсам турбачудай
бир кызык болуп турам.
Көрүнбөйт эч ким жолдо,
акыркы күчүм жыйнап,
а балким келатат деп
артымды карайм улам…

Рахат ЖУМАНАЗАРОВА Ачык / Комментарий