2020-12-29 23:04:45
Биринчи жолу сайт жасоого заказ алганымда...
2018 жылдын январь айы. Бишкектин окуу жайларынын биринде 2 курста окуп аткан учурум. Ал убакта досум менен көптөгөн сайттарды ойноп жасап көрүп, ар кандай хакантон-жарыштарга катышып, жакшы эле тажрыйба топтоп калган элем. Бир эле нерсе калган болчу бул өнөрүм менен акча тапканды үйрөнгүм келди.
Ар кандай компанияларга кайрылдым: баары тең "кийин өзүбүз чалып койобуз" деп эле узатып жатышты. Интернеттен да кантип, кайдан заказ табат экендигинен такыр маалыматым жок эле.
Ошентип күндөрдүн биринде Туркиядан бир досум
20 миң сомго заказ тапканын айтып калды. Ал учурда мен телефонумду да сындырып алган элем, дароо макул болуп, тапкан акчама жаңы телефон алууну чечтим.
Досум сайттын Front-End жагын жасап, мен Back-End'ин жасамай болдум.
Бул
жашоомдо эң биринчи заказ болгону үчүн сүйүнүчүм койнума батпай, анда болгон сезимдер дагы деле эсимден кетпейт.
Күндө сабактан кийин болгон убакытымды заказды аткарууга жумшап, уктабаган да түндөр болгон эле. Досум экөөбүз күндө чалышып, проектти талкуулап жүрдүк. Бат эле бир жарым ай өтүп, берилген сайтты да бүтүрдүк. Бүтөөрдө заказчик дагы да кошумча функцияларды сурап, алар бүткөн соң толук төлөп берээрин айтты. Дагы 2-3 жумадай иштедик. Жасалчу иштер деле бүтүп, сайт ишке кирип калган болчу, бирок негедир заказчигибиз убакытты чоюп жатты.
Дагы бираз күттүк, бир жумадан кийин досум чалып
"Заказчик сайттан баш тартты" деп айтып калды. Экөөбүз тең аябай капа болдук, эки айлык ишибиз текке кеткен эле. Бирок кылаарга башка иш жок болчу, экөөбүз тең жашпыз, эч кандай келишими жок эле заказ алып алган элек. Жана да заказчик Туркиядан болчу. Акыры бул иш ошо бойдон калып кетти.
"Туркиянын компаниясына сайт жасагам" деп резюмеме жазып алып, кайра заказ же жумуш издеп жүрдүм. Аз убакыт өтпөй эле Бишкектин ири компанияларынын бирине стажировкага кирип калдым. Биринчи заказды жасап жатканда топтогон тажрыйбам жаңы орношкон компанияда аябай чоң жардамын берди.
1-2 жуманын ичинде бат эле стажировкадан чыгып кеттим да, толук кандуу ишке орношуп иштеп калдым.
Кийиничерээк ойлонуп көрсөм,
бул жагдай жолумда өтүш керек болгон эң маанилүү этаптардын бири болгон экен. Бул проектти жасабасам, андан аары программист катары өсүү кыйын болмок экен.
Негизи жашоодо кандай жагдайга туш болбосок да, жакшысы да, жаманы да - бардыгы койгон максатыбызга тезирээк жетүүбүзгө жардам берет экен.
А сен кандай учурларды башыңан өткөрдүң эле?
3.2K viewsErkebek Abdrakhman uulu, 20:04
П
