2022-12-26 00:05:15
Билдириишкинни декабрь 28-тен хүлээп эгелээр
Декабрь 23-те ТР-ниң Чазак Даргазының оралакчызы Елена Хардикованың деңнелинге РФ-тиң Социал фондузунуң Тыва Республикада регион салбырының удуртукчузу Светлана Кенден массалыг информация чепсектериниң ажылдакчыларынга 2023 чылдан тура чаңгыс аай дузаламчы акша төлевирлерин (уругларга болгаш иштиг херээжен чонга төлээр акшаны) канчаар бээриниң чурумун таныштырган.
Елена Хардикова баштайгы сөстү алгаш:
– ТР-ниң Чазак Даргазы Владислав Ховалыг бодунуң Айыткалынга бо айтырыг дугайында тускай доктаап, уругларга болгаш иштиг херээжен чонга көрдүнген төлевирлерни чаа чурум ёзугаар үе-шаанда чорудары чугула деп демдеглээн. Бо талазы-биле айтырыг бистиң шыңгыы кичээнгейивисте. Чаңгыс аай дузаламчы акша төлевирлерни алыр ужурлуг өг-бүлелер чаңгызы-даа чыдып калбас болзун дээш ажылды чорудары-биле чонга тайылбыр ажылын күштелдирери чугула.
Эгезинде чаңгыс аай дузаламчы акша төлевирлерни кым төлээр ужурлуг деп айтырыгга доктаап, тодаргайлап алыры чугула. 2023 чылдың январь 1-ден тура ийи фонд – РФ-тиң Пенсия фондузу биле РФ-тиң Социал камгаладылга фондузунуң чорудуп турганы күрүнениң социал деткимчезин, дузаламчы акша төлевирлерни боттандырарын чаңгыс РФ-тиң Социал фондузунга хүлээндирген.
Чаңгыс аай дузаламчы акша төлевир деп чүл ол деп айтырыгга харыы билдингир деп бодаар-дыр мен. Чүге дээрге күрүнениң социал деткимчезин ие кижи иштиг апарган үезинден тура ап эгелээш, уруг төрүттүнгенде, оон 3 харга чедир, 3-тен 7 харга чедир, 8-тен 17 харга чедир аңгы-аңгы дузаламчы акша төлевирни алыр болгай. Бир эвес ооң мурнунда шак бо дузаламчы акша төлевирни алырда, каш удаа документилерни аңгы-аңгы черлерже дужаар турган болза, ам байдал көңгүс чиигээн. Ава кижи иштиг апаргаш, эмчиниң хайгааралынга туруп алган үезинден эгелээш, уруу 17 хар четкижеге дузаламчы акша төлевирлерни алырда, артык документилер долдуруп, дужаап турбас. Ол дээрге уругга көрдүнген 5 аңгы дузаламчы акша төлевирни үе-чадазының аайы-биле ведомстволар аразында социал албан черлери боттары-ла чаартып турар боор. Уруглар пособиезин регионда көрдүнген чурттаарының кудуку хемчээлинден эвээш орулгалыг өг-бүлелерниң уруг-дарыынга төлээр. Ол дээрге 2023 чылдың январь 1-ден тура — 14,519 рубль – деп, ол кысказы-биле тайылбырлаан.
РФ-тиң Социал фондузунуң Тыва Республикада регион салбырының удуртукчузу Светлана Кенден улаштыр тайылбырлаан:
– Чаңгыс аай дузаламчы акша төлевирни кончуг эптиг дээрзин демдеглээри чугула. Ооң хемчээли өг-бүлениң орулгазындан дорт хамааржыр. Ынчан уруглар акшазының 50 хуузу – 7216,5 рубль, 75 хуузу – 10824,75 рубль, 100 хуузу – 14 433 рубльди төлээри оон хамааржыр.
Иштиг херээженнерге дузаламчы акша төлевирни 50, 57, 100 хуу хемчээлге төлээрде, регионда көрдүнген чурттаарының кудуку хемчээлинге үндезилеп санаар. Тывага ооң хемчээли 2023 чылдың январь 1-ден тура 15826 рубль болур. Ынчалдыр иштиг иелерниң чаңгыс аай дузаламчы акша төлевириниң 50 хуузу – 7913 рубль, 75 хуузу – 11, 869,5 рубль, 100 хуузу – 15826 рубль.
Ол ышкаш өг-бүлелер чаңгыс аай дузаламчы акша төлевиринче шилчиир мурнунда, эрги төлевирлерин ол хевээр арттырып алыр азы чаа чурумче шилчиирин боттары шилип алыр эргелиг. 2023 чылга чедир төрүттүнген 3 харга чедир уруг-дарыглыг ада-иелер эрги төлевирлер-биле дузаламчы акша төлевирни уруу 3 харлаптарынга чедир ап болур.
Чаңгыс аай дузаламчы акша төлевирни кылганының ачызында Россияга өг-бүлелерге уруг-дарыы 17 хар четкижеге чедир адрес ёзугаар комплекстиг деткимче чорудар хемчеглер ажылдап кылдынган.
Чаңгыс аай дузаламчы акша төлевирин алырынче билдириишкиннерни декабрь 28-тен эгелеп Госуслуги порталга хүлээп эгелей бээр. 2023 чылдың январь 9-тан тура ада-иелерден билдириишкиннерни МФЦ болгаш Социал фондунуң офистеринге хүлээп эгелээр – деп, ол тайылбырлаан.
Карина МОНГУШ.
1.5K viewsБорбаана Баржай, 21:05
Б
