Бүгүн Майа олохтоохторугар үөрүүлээх күн үүннэ. Общественнай т | Майа сонуннара

Бүгүн Майа олохтоохторугар үөрүүлээх күн үүннэ. Общественнай түмсүүлэр, түөлбэлэр бас билэр дьиэлэннилэр. Ол курдук, «Дьол түһүлгэтин» дьиэтигэр общественнай киин тэриллэн үлэтин саҕалаата. Барыта 45 общественнай түмсүү, «Благодеяние» фонда уонна 21 түөлбэ, ол иһигэр 3 ТОС, биир дьиэлэнэн-уоттанан үлэлиэхтэрэ.
Киин аһыллыытын, сахалыы сиэринэн аал уоту оттон алҕаан, алгыс этэн саҕалаатылар. Мустубут дьону «Майа сэлиэнньэтэ» тыа сирин түөлбэтин баһылыга Алексей Иннокентьевич Неустроев эҕэрдэлээтэ уонна наҕараадалары туттартаата.
Мэҥэ-Хаҥалас улууһун социальнай политикаҕа управлениетын салайааччыта Октябрина Никитична Кулешова кэлэн улуус Аҕа баһылыгын уонна бэйэтин аатыттан эҕэрдэтин эттэ.
«Түмэн» общественнай холбоһук салайааччыта Мария Дмитриевна Лукина сэлиэнньэ олоҕор өрүү көхтөөх сыһыаннаах мустубут биир санаалаах дьонугар-сэргэтигэр инникитин өссө таһаарыылаахтык үлэлиэхпит диэн баҕа санаатын эттэ.
Түмсүүлэр бу үөрүүлээх күнү ырыаларынан, үҥкүүлэринэн киэргэттилэр, коллекционердар интириэһинэй быыстапка туруордулар.