Aisuluu Almaz✨

2023-01-06 07:31:33 Кичинемде сарысың дешсе өзүмдү жээричүмүн…

Кичинекейимден тегерегимдегилердин баары сары дейт. Бизде сары экен, ак экен анан кара экен деп элдерди бөлүштүргөн аябай өнүккөн го, кээ бирөө “ай сары кыз” деп сүйүп айтат, кээ бирөө “ии сары турбайбы” деп жээрип айтат.

Чоңоюп чет өлкөлөргө чыгып, башка улуттагы, өңдөгү элдерди көргөнгө чейин сары десе эле өтө терс кабыл алчумун.

Күнгө чыкканымда чекемдеги майда сары чачтар жылтырап, күндүн нуру менен чагылышканда кадимкидей жиним келчү. Ошондон улам го мектепте окуп жүргөнүмдө эле чачымды боёп баштагам.

Азыркыдай интернеттен жылдыздарды көрүп, туурап сулууланат деген жок болчу. Дүкөнгө барып, даана кара эмес же күрөң эмес экен деп “баклажановый” деген өңүнөн алып боёчумун. Чекемдеги сары чачтар кыпкызыл, калган төбө тарабы күнгө чыксаң көгүлтүр өң берчү.

2011-жылы Куала Лумпурда окуп жүрүп, чач боёгонго мүмкүнчүлүгүм болбой, бир карыштай төбөмдө өзүмдүн чачым өсүп, чач тарачка бир аз учтарын кыскарттырайын дер барсам чач тарач жигит “ай сеникиндей табигый күрөң чач жасай албай канча кыз жүрөт, боёп эмне бузуп жатасың” дегенде эсиме келгем.

Ошондон бери такыр чач боёбойм, кайсы чач тарачка барбайын, “ии чачың сонун күрөң, боёлбой жупжумшак турбайбы” деп жагымдуу сөздөрүн көп айтышат.

Бизде каш-чач, тырмагын жасап жүргөн коомдо аябай бааланат го, боёнбой жөн эле жүрсөң жүдөп деп.

Көпчүлүк чет элдерде аялдын өзүн мүмкүн болушунча табигый, ашыкча боексуз алып жүрүүсү бааланат. Мисалы Канадада жергиликтүү айымдардын чачын же тырмагын боёп жүргөнүн чанда көрөсүң. Ал тургай чачы агарганда да жакшынакай кылып кестирип коюп, боёбой эле жүрө беришет.

Жакшы карыш керек, аялдын жашын сурабайт деп карыган да табигый кубулуш экенин кабыл ала албай кыйналабыз.

Өзүбүздү турган турпат, чыккан ак чач, беттеги бырыш, белдеги ашыкча КГларыбыз менен эле жакшы көрө берсек болбойбу?

Ансыз да жашоо көз ачып жумгуча өтүп жатат...

3 жыл мурун жазыптырмын. Ачык / Комментарий

2023-01-05 07:34:08 Эмнеге эркектик бакыт деген түшүнүк жок…

Туулган күндөрдө же майрамдарда кыздарга, айымдарга аялдык бакыт каалайм дегенди көп угам. Эң негизгиси аялдык бакыт каалайм, жолдошуң, балдарың үй жайың болуп бактылуу аял бол деген сымал кошумча каалоо-тилектер менен жыйынтыкталат тосттор.

Азыр дүйнө кеңири, мүмкүнчүлүк чачтан көп, аялдык бакыт күйөө, бала анан жылуу үй менен эле чектелбейт да. Жакшы көргөн ишиң, кызыкчылыктарга бөлгөнгө убактың, үйүңдө, коомдо укуктарыңдын корголуп, үнүңдү угуза билүүң деген сымал кошумча бакыттар менен коштолуп биз билген аялдык бакыт каалоо тилеги кадимки адамдык бакыт тилегине айлануусуна убакыт келбедиби.

Анан аялдык бакыт каалайм дегенди уккан сайын эмнеге эркектик бакыт каалайм деген жок деп ойлоно берем.

Коом балким эркекти ансыз деле бактылуу, кошумча бакытка муктаждыгы жок, же эркек бактылуу болбой койсо деле болот деп кабыл алып алганбы…

Же эркек маймылдан бир аз айырмаланса эле болду, мейли эркек да жарашпаган кийим кийип, курсак байлап жүрсө жүрө берсин, окубаса мейли жигит да эч нерсе болбойт, тамак былтыйып даамсыз болсо деле мейли, закыйган киши жеп алат, эркекке боло берет деп, коом эркекти ылдыйкы даражадагы жандык катары көргөнүнөн тарбиясыз, өзүнө эле эмес тегерегиндегилерге да зордук-зомбулук көрсөтүп күн көрсөтпөгөн, майдаланган эркектер көбөйбөй элеби?

Жазында Кыргызстанга барганда баламды ии төшү кирдептир, кийимин которуп келейин же андай тамактарды жебейт, ден соолугуна зыян десек “Алман деген жигит да эч нерсе болбойт, ошондой эле жүрө берсин, жей берсин” дегендерди көп угуп капа болдум.

Эркек болгону үчүн эле балама, деги эле эч бир күнөөсүз эркекке андай басмырлаган мамиле көрүүсүн каалабайм…

Баламдын тамактын эң жакшысын жеп, кийимдин сапаттуу тазасын кийип, кийин буюрса чоңойгонунда жакшынкай болуп өзүн, ден соолугун карап, кам көрүп, билим алып, жогоруда айткандай адамдык бакыттарга ээ болуп жыргал жашоо сүрүүсүн чын жүрөктөн тилейм.

эски күндөлүгүмдөн. Ачык / Комментарий

2023-01-03 17:36:09 Кээ бирин макул бул кылганым үчүн деп кабыл алсам, кээ бири чындап адилетсиз сезилип капа болуп, жашоомо же жумушума чындап көңүл бура албай, үшкүрүнүп жүргөнүмдө абалымды көргөн Арстан “мага макул болуп үйлөнбөсөң ушунун баарын укпайт элең, мени кечирип койчу” деп кечирим сурады эле.

Жерге түшүп сүйрөлүп калган көңүлүм менен өзүмө болгон ишеничимди бир эле сүйлөм кандай көтөрүп кеткен эстесем… Балким ошол сүйлөм үй бүлөбүздү сактап калган деп ойлой берем…

Кайын журт менен келин түшүнбөстүгү болгон учурда көпчүлүк учурда келинди күнөөлүү деп табышып, келиндин жолдошу кечирим сурамак тургай “сен менин үй бүлөмө ушундай мамиле жасадың” деп ого бетер жемелеп, ал аз келгенсип “бизди же аялыңды танда” деп үй бүлөсү шарт коюп канча үй бүлө “мени, бизди адилетсидик кылсак кечирип койчу” деген бир сүйлөмгө зар болуп чачырап, ажырашып кетип жатат…

Түйгөйлөр эле ажырашса жакшы да, ортодо бейкүнөө тирүүлөй жетим калган балдарчы…

Кечиримдүү, айкөл болгон адамда эң керек ыйык сапат дейбиз. Бирок өзүңдү жеңип, катаңды мойнуңа алып “мени кечирип койчу” дей билген андан да бийик, ыйык сапат менимче… Ачык / Комментарий

2023-01-03 17:36:08 Кечирим суроонун жашы, жынысы жок…

Ичиңден чыккан балаңды баарынан жакшы көрүп, дүйнөдө эмне сонун сезимдер болсо балаңа тартуулагың келип, күндүр-түндүр коопсуздугун тынбай ойлогонуң менен кээде адамсың да, мен мындай эне болом деп куруп алган жоопкерчиликтериңен чыгып, мен такыр антпейм деген аракеттерди кылып жиберет экенсиң.

Алгачкы айларда көп билинген эмес, Арстан 4 айлык биз менен декреттик өргүүгө чыгып бизди багышып жатканынан сезилген эмес чыгаар… Алман 6-7 айларында денем эле эмес мээм кошо чарчап, уктасам уйкум канбай, улам ыйлагым келип, ыйлаган сайын ушул сонун жашоону кыялданып, эмгек кылып жатып курдук да, ыйлаганым эмнеси деп кайра өзүмдү жектеп бир топ кыйналдым.

Төрөгөндөн кийин энелер кайгыга батып, депрессия болот деп коет го, Кудайга шүгүр абалым ага жеткен жок. Азыр Алман салыштырмалуу бир аз чоңоюп, баккан жеңилирээк болуп, өзүмдү караганга убактым көбүрөөк артып, акылым тунуп, артка кайрылып абалымда баамдасам болгону аябай чарчаптырмын…

Эсимде, түнкүсүн туруп 2,5-3 саатта бир эмизип жүргөн убактарда аябай чарчап, күнү түнү уйкум келип кыйналып жүрсөм, ортодо 6 айлык кезинде Алмандын уйку сааттары бузулуп, уктата албай айлабыз кетип, кечке колго алып отуруп, канча сааттан бери отурабыз, уктабайсыңбы деп кыйкырып урушуп ийип, Арстан аркы бөлмөдөн келе калып “кичинекей балага эмнеге үнүңдү көтөрөсүң, мен эмизе албай жатам болбосо өзүм эле бакмакмын” деп мени урушуп, чарчап жүрүп өзүмдү башкара албай калдым деп мен Алмандан кечирим сураган күнүм такыр эсимен кетпейт.

Негизи эле балага кол көтөрбөйбүз, кыйкырып урушпайбыз, мүмкүн болушунча маселенин баарын сүйлөшүп чечебиз, түшүндүрүп тарбиялайбыз деп балалуу болордо макулдашканбыз.

Анан жогорудагы окуядан кийин өзүмдү бир топко жектеп, аябай жаман сезип жүрдүм. Бирок аралаш сезимдердин арасында, өзүмдү башкара албай турсам да убагында, Алманды кичинекей эмнени түшүнмөк эле деп баласынтпай кечирим сурап жетишкениме ичимден өзүмө ыраазы болом.

Ал окуя эле эмес, негизи эле айтканыбызды аткарбай, мисалы бакчадан бүгүн сени эртерээк төрттө алып кетем деп коюп бир аз кечиксек да, эмнеге кечиккенибизди айтып кечирим сурайбыз.

Бизде баладан кечирим суроо деген маданият жок го. Балким башкалардын үйлөрүндө бардыр, бирок баладан кечирим сурап жаткандарды менин айланамда көрө элекмин.

Анан биздин биз улуубуз, ата-энеңбиз деп чоңсунбай Алмандан тили чыга элек болсо да адилетсиздик кылсак кечирим сурап, бала эле эмессиң сен да дагы адамсың, коомдун бир мүчөсүсүң деген түшүнүктү азыртадан калыптантып жатканыбызга кубанам.

Бала эле эмес бизде чоңдор арасында деле кечирим сурап, себеп кылган жүрөктөгү жараларды айыктырып, элдешип, аң сезимдүү чоң адам катары мамиле куруу сымал маданияты көп жок да.

Күндөлүктөрүмдө Арстан экөөбүздүн мамилерибизди кээ бир темаларга мисал кылып жазсам, “эл сенин жазганыңды окусун деп калп айтып жатат окшойсуң, күйөөңдү обу жок мактайт экенсиң” деген сымал каттар келет.

Маселени тынч отуруп, бир-бирин жемелеп жаман сөз айтпай, бир-бирин сындабай угуп, адилетсиздиктери үчүн кечирим сурашып мамиле курган маданияттан келбесек да, азыр кандай бир-бирибизди сыйлап, барктаган аң сезими жетишкен түгөйлөрдүкүдөй мамилебиз бар болсо, баары түшүнбөстүктөрүбүздү, көйгөйлөрүбүздү убагында таап, мен эркекмин, мен аялмын деп жыныска сыпаттабай, баарын тынч отуруп сүйлөшүп, кечирим сураган талыкпас эмгектерибиздин натыйжасы.

Жаңы үйлөнгөндөн кийин бир канча жыл кайын журтка көнө албай, жаңы үй бүлөгө аралашып бата албай, өзүңдү турган турпатың менен жөн эле шартсыз кабыл алдырта албай далай беймаза болосуң го…

Алыста жашаганыбыз менен телефон-интернет аркылуу, узактан курган кадимки келиндердикиндей эле менин да кайын журтум менен мамилем бар. Алман төрөлөт деген кабар алганыбыздан бери баарыбыздын болгон көңүлүбүз Алманга жумшалып, мамилелерибиз оңолуп калды, болбосо менин кайын журтум менен болгон мамилем көпчүлүк келиндердикинен эч айырмаланбайт.

Эсимде пандемия башталып жаткан жылы, чоң түшүнбөстүктөр болуп, тарабыма такыр күтпөгөн сөздөрдү уккам. Ачык / Комментарий

2022-12-31 19:11:47 Жаңы жылыңар менен!

Жаңы жылда баарыңарга ден соолук, амандык жана жан дүйнө тынчтыгын каалайм

Чакан кыргызча күндөлүгүмдү убакыт бөлүп окуп, колдоп, бирге болгонуңар үчүн ыраазымын Ачык / Комментарий

2022-12-30 22:28:11 Кошунаны тандабайт…

Пандемия үйдөн иштөө түшүнүгүн тааныштырып, деги эле көпчүлүк учурда үйдө болуп, кошуналардын көбүн тааныганга мүмкүнчүлүгүбүз болду…

Чоң шаарларда, бийик кабат үйлөрдө тегерегиңде кимдер жашайт көп деле билбейсиң го. Анын үстүнө биз сымал кошуналар менен айтташып, чай ичип, черная касса ойноп ийген маданият жок бул жакта…кокус каршылашып калсаң жылмайып күлүп учурашып коёсуң да анан кайсы катта жашайсың, ким менен жашайсың, кайда иштейсиң, кайсы жерден болосуң деп сурамай да жок.

Үйдөн иштеп, балконго улам чыгып, жарык болуп үйгө кирип чыккандын баарын көрүп, катташып сүйлөшпөсөк да кошунанын көбүн алыстан таанып калдык.

Анан “Кошунаны тандабайттын”экинчи фильми чыгыптыр, көрүп отуруп алыстагы туугандан жаныңдагы кошуна артык деген макалдын маанисин жакшылап түшүнүп, күндөлүгүмө кызыктуу, эстеп жүрчү кошуна жоруктарынан жазып койсом кийин барактап ушул жерлерде жашачу эмес белем дегенге сонун болчудай деген ой келди.

Торонтодо жашап жүргөнүбүздө сол тарабыбызда жашаган үйбүлө күн алыс эле уруша берчү…кыйкырып жатып да бир-бирине “балым” (honey) деп маданияттуу урушушчу, бал-шекер кошуналар деп койчубуз.

Басканда дук-дук деп үн чыгарып катуу басам, анан ал ошол эле үйдө Торонтодо жашап жүргөндө ылдыйкы каттагы кошуналарга жакпай, “жок дегенде кечкисин акырын баскылачы” деп кат жазып кетишип, эми сөзсүз мышыктай болуп басабыз деп, гүл берип кечирим сураганбыз.

Кечке эле мышык боло бермек белең, 1-2 айдан кийин эле кайра капа болгон кат келип, дүкөндөн шарап алып барып берип кайра кечирим сураганбыз… ошол боюнча элдешкенбиз.

Азыркы жашаган Монреалдагы үйүбүздө оң тарабыбызда жашаган кошуна жигит электрондук гитара чертет экен. Кечки саат 6дан кийин эле кыңылдатып маанисиз эле бирдемкени чертип калат, үйрөнүп жаткан го деп калабыз. Күндө машыкканына карабай үйрөнө албай жатат окшойт, канчадан бери эле кыңылдак өзгөрө элек.

Өткөндө кошуна бүгүн тынч, үйдө жок го деп коюп сыртка чыгып баратсак скейт тактайын тээп гаражда жүрүптүр. Анан да “менин гитара черткеним угулбай элеби, тынчыңарды алса айткыла” дейт. Керексиз кичипейилбиз да, жоок-жоок дедик дароо.

Ал жигиттен анда-санда биз жокто үйдү карап, каттарды алып тур деп калабыз, анан кой кудай кошкон кошунабыз эмеспи, үйгө барганда белек ала келип берели деп, кийизден жасалган үйгө кийген тапичке ала келип бергенбиз жазында.

Мурда күнү таштанды ыргытайын деп Арстан сыртка чыкса кошуна жигит баягы тапичкени кийип, келген каттарын текшерип кат кутусунан жанында туруптур дейт. “Кийиз тапичкени кайдан кийсин, башка эле бир нерсе алып келсек болмок экен деп кайгырып жаттың эле, мына кийип жүрөт” деп Арстан үйгө сүйүнүп келиптир…

Арзыбаган эле нерсе, бирок тээ океандын аркы бетинен бери алып келген белекти баалап кийип алганына аябай кубандым…

биздин кошуналарды жаздым, силердин кошуналарыңар кандай? Ачык / Комментарий

2022-12-28 22:00:01 Анан Алман төрөлгөндө төрт ай мени менен кошо декреттик өргүүгө чыгып, кийин Алман он айлыгында менин элге аралашып иштегим келгенин түшүнүп кайра декреттик өргүүгө чыгып, Алман бир аз дагы чоңоюп бакчага баргыча өзү үйдөн карап, сезим, мээрим, багуу жоопкерчиликтерин 50-50% тең бөлүшкөн аң сезимдүү, заманбап ата-эне болуубузга чоң көмөк көрсөтүп, шарт түзүп жаткан Арстанга абдан ыраазы болуп калдым.

Биз эле эмес тегерегибизде бир топ тааныштарыбыздын 50-50% моделинде бала багуу, чоңойтуу ыкмасын негизги эреже кылып жаткандары кубантат.

Бактылуу бала, кийин бактылуу жетишкен чоң адам, бактылуу жетишкен коомдун пайдубалы да түшүнгөнгө… Ачык / Комментарий

2022-12-28 22:00:01 Ата баласы менен энеге караганда көбүрөөк сыймыктанбайбы?

Ата-энелер балдары менен качан, эмнеге сыймыктанбай калат деп өткөндө жазганымда:

“Энемден да атам биз менен сыймыктанбайт, качан болсо элдин балдарын карачы, баланчанын кызын-баласын карачы, баланча өлкөдө жашап, шумдук жерде иштеп, гезиттерге чейин аты чыгып, ата-эне, бир туугандарына үй салып берип, укмуш эстүү болуптур, а сенчи деген ачуу сынын канчага чыгып, канча балалуу болгон чоң адам болсом да койгон жок.

Акыркы күндөрү атам менен такыр сүйлөшкүм келбейт, сеники чын деп коюп кутулам, атама мени болгонумдай шартсыз кабыл алуусу мүмкүн болбой калды го, мейли эми кааласам-каалабасам да атам да” деген сымал каттар көп келди.

Иним Каниет экөөбүздүн папабыз мен бир жаш, иним курсакта кезинде унаа кырсыгынан каза болуп, мамам жыйырма эки жашында жолдошун жоготкон бойдон турмушка чыкпай бизди багып, бизге кошуп баласын жоготуп дүйнөсү кулап отуруп калган чоң эне, чоң атамды кошо багып, ушул күнгө чейин алгачкы келин болуп келген үйдө учурда энемди багып, карап жашайт.

Папабыз мен өтө кичинекей кезде өтүп кеткенинен менин такыр эсимде жок, ал тургай ата деген кандай болот болду экен деген сезим да жок.

“Өмүрүмдө авокадо жеп көрө элекмин, ал кандай болот” деп кээде авокадонун сүрөтүн бөлүшүп калсам каттар келет. Дал ошол авокадонун даамын билбеген сымал “ата” сезиминин даамын билбейм…

Чоң атам биздин чоңоюубузга, балалыгыбызга аралашып дайым жаныбызда болгону менен, чоң ата небересин, өзгөчө колунда жашаган үйдөгү небересин өзгөчө көрөт, ошол сымал чоң атамдын шартсыз, чексиз сүйүүсүнөн башка эч бир сезим көргөн эмесмин.

Анан “атам мени менен такыр сыймыктанбайт” деген каттарды сезе албай аябай бүдөмүк абалда калдым. Себеби “ата-бала” сезиминен тагдыр кереги кур калгам…

Келген каттарга эмне деп жооп берээримди билбей, сиз жалгыз эмессиз, менде да дал ошондой сезим болгон дей албай, кээ бириңердин катыңарга жүрөк басып койгондон башка эч нерсе кыла алган жокмун.

Кийин чоңойгондо өзүнө куурап психолог издеп калбасын, биз бактылуу балалык тартуулап, өзүнө ишенген, өзүн урматтаган бактылуу баланы кантип чоңойто алабыз деп Арстан экөөбүз Алман курсакта кезинен баштап изилдөөлөрдү окуп, бала тарбиялоо боюнча адистердин кептерин угуп, бизге жаккандарын кулагыбызга күмүш сырга кылып илип, акырындан үйрөнгөндөрүбүздү бала багуу ыкмаларыбызга кошуп турабыз.

Анан өткөндө он беш айлык баланын кандай өзгөчөлүктөрү бар, мээ жана дене өнүгүүсүнө биз кандай туура жардам бере алабыз деп интернеттен түрдүү маалыматтарды издеп отуруп, Канадалык доктур, бала багуу боюнча белгилүү изилдөөлөрдүн автору Доктор Габор Матенин ата менен баланын мамилеси жөнүндө сонун айткандарын окуп калдым.

Доктур “илгертен бери, ал эле эмес азыркы убакта дагы, үй бүлөдө ата акча-каражат таап үй бүлөнү багуучу, эне үйдө балдарды карап негизги тарбиялоочу болуп тиричилик жоопкерчиликтери бөлүшүлүп калган.

Анан ата, баланы багууга физикалык жактан дээрлик такыр аралашпай, ата менен баланын ортосунда эне-баланыкындай жакын мамиле курулбай, ата көпчүлүк учурда мен акча каражатын таап жатам, сен ишеничимди актаган жакшы-жетишкен бала болуп чоңой деген сымал талаптарды коюп, анан кийин бала чоңойгондо ошол талаптар аткарылып жатабы деп улам тактап сураган, баарын контролдоп башкаргысы келген бири болуп калат. Ошондуктан кийин чоңойгондо да көпчүлүктүн атасы менен болгон мамилеси начар” дейт.

Канча күндөн бери силердин каттарыңардан улам пайда болгон суроолорго жооп алгандай эс алып калдым.

Менин энем курактуу улуу муундар тууралуу айта албайм, бирок биздин ата-энелерибиз, мына эми окуумду бүтүп иштейм, келечегимди курам деп турган маалда Совет доору кулап, жаңы жаш өлкөнүн жараны болуп, иштейин десе жумуш жок, жан багуунун айласы кылып жасабаган жумуш-бизнеси калбай, балдарын азыр биздин тажрыйбабызга салыштырмалуу кыйынчылык-жокчулукта чоңойтуп, Доктор Габор айткан талап коюп, талаптарым аткарылып жатабы деп баласынын аркасынан аңдып алган атага, энеге айланып калышкандай… Ачык / Комментарий

2022-12-27 21:44:26 Жөнөкөйлүк жаңы замандагы сулуулук…

Жаңы жылда буюрса Канадага көчүп келгенибизге беш жыл болот экен анан беш жылда кандай өзгөрүүлөр, болду, мен кандай өзгөрдүм, өнүгө алдымбы, жаңы журтташтар мага эмне үйрөттү деп ойлонуп жүрөм бир канча күндөн бери.

Анан ойлосом Канадалыктардан эң биринчи жөнөкөйлүктү, эч кимден эч нерсе күтпөгөндү (өзгөчө жакындарыңдан) анан жашооңо ыраазы болуп жашаганды үйрөнүптүрмүн…

Мисалы жаңы машине алдым, үй алдым, мындай көйнөк алдым, мына сага Шанелден сумка алдым, ии атыр алдым, өзүңдү жакшы көрүш керек экен деп мындай бут кийим алдым деп мактанбайт эч ким бул жакта.

Боюмда бар, азыр эл алдында шар жарып жынысын билебиз да дебейт. Балким жыныс үйрөнүү майрамын уюштуруп жаткандар бардыр, бирок биздин тегерегибиздеги тааныштарыбыздан көрө элекпиз.

Эл IT окуп Америкага кетип жатыптыр, тезирээк кесибимди алмаштырып мен да жан талашайын дегендерди да көрө элекмин. Деги эле ким эмне жумуш кылса, таштанды жыйнагычпы, сантехникпи, электрикпи же дүкөндө сатуучубу баары жашоосуна ыраазы.

Тапканы жашоосуна жетип жатканы да ал үчүн чоң жардам болсо керек албетте.

Эл муну кылып жатыптыр, тигини кылып жатыптыр кокуй мен да кыймылдайын деп жатып отуруп, дем алып өз жашообузду, бүгүндү жашабай калабыз го…

Эл менен жарышып жашап жүрүп мен эмне кылганды жакшы көрөм, эмнеге шыгым бар, эмне жумуш кылганга дараметим-кудуретим жетет деп суроо бергенге да үлгүрбөй өмүрүбүз өтүп кетет…

Анан акыркы жылдары, өзгөчө Алман төрөлгөндөн кийин, жашоомду, каалоолорумду, максат-тилектеримди, ал тургай кийген кийимдериме чейин электен өткөзүп, мага чындап азыр эмне керек, эмне менен алектенген жагат, мага эмне жакшы энергия жана бакыт тартуулайт деп иргеп, жашоомду, өзүмдү бир топ жөнөкөйлөштүрдүм.

Улам өсүп өнүгүп, өзгөчө ийгиликтерге жетип баштаганыңда жашооңдон кээ бир адамдар өзү эле чыгып кетет экен. Мамилерди оңдоп, кеткен адамдарды кайра чакырып энергия коротуп, өзүмдү далилдегенге аракет кылбай, мурда эң жакыным деп жүргөн дос-туугандарымды да кое бере ала турган деңгээлге жетип чоңойдум.

Кечээ тарыхчаларда суроо-жооп уюштурсам “сиз аябай жөнөкөй экенсиз” деген жөн эле жакшы каалоо-тилек менен коштолгон бир тлп кат келиптир.

Жөнөкөйлүгүмдү байкаган курч көзүңөргө рахмат.

Жөнөкөйлүк мен үчүн жөн эле боенуп жасанбай, мактанып чалчактабай жүрүү эмес, болгон табигатыңды шартсыз кабыл алып, кемчиликтериң болсо оңдоп, тарбиялап, үйдө бир, сыртта башка бири болбой жалгыз жүздүү ичи-тышы бирдей адам болуу… Ал үчүн өзүмдү тарбиялап, азыркы абалыма келүүгө далай эмгек жумшадым.

Анан дагы улам өнүгүп, өсүп, бийиктеген сайын жерге жакын болууну сезе билүү да чоң эмгекти талап кылган сапат экен. Ошону да убагында аңдап, улам жаңы ийгиликке жеткен сайын ого бетер жерге жакын болуп жөнөкөйлөшүп баратканыма абдан кубанам…

Чындап билгенге, түшүнгөнгө жөнөкөйлүк бул жаңы заманда сулуулук… Ачык / Комментарий

2022-12-25 19:54:44 Анан жогоруда айткан кызгануу, же ишенбей кайгырган сезимдер өзүнөн өзү жоголуп кетти.

Азыр ойлосом, ал кызгануу сымал керексиз сезимдер өзүмө болгон ишеничимдин пайда болуусу, өзүмдү жакшылап таанып, өзүмдү сыйлаганды үйрөнүп баштоо менен жоголуптур.

Анан да сенден кете турган адам, байласаң да сенден кетет, адам адамдын менчиги эмес, өзгөчө сезимдерин тебелеп, башкарып алууга укугуң жок, дени сак мамиле куруу үчүн алгач өзүңдү тарбиялооң керек экенин түшүнгөнүм да чоң жардам берди.

Үй бүлө куруп, өзгөчө балалуу болгондон кийин түгөйдөн мурун сен ата-энесиң, кандай абал болбосун экөөңдүн ортоңдогу мамиле баланын бактысыз болуп калуусуна себеп болбосун деген жоопкерчилик пайда болду.

Анан керексиз, жан соолугуңа зыян келтире турган сезимдерге чындап орун калбай калат экен…

1-бөлүм

Өтө чоң жана терең тема…

Ойлорумдун көбүн бир канча баракка батыра албай калдым, буюрса бул туурасында дагы жазам… Ачык / Комментарий